इस्लामाबाद। पाकिस्तानले अमेरिका र इरानबीच जारी तनाव समाधानका लागि निर्णायक वार्ता आयोजना गर्ने भएको छ। पाकिस्तानका प्रधानमन्त्री शाहबाज शरीफ ले युद्धविराम घोषणा लगत्तै यस हप्ताको अन्त्यमा दुवै देशका प्रतिनिधिमण्डललाई इस्लामाबादमा स्वागत गरिने जानकारी दिएका हुन्।

प्रधानमन्त्री शरीफले सामाजिक सञ्जाल ‘एक्स’ मार्फत शुक्रबार हुने वार्ताका लागि औपचारिक निमन्त्रणा दिँदै अमेरिका र इरानका नेतृत्वप्रति कृतज्ञता व्यक्त गरेका छन्। उनले ‘इस्लामाबाद वार्ता’ले दीर्घकालीन शान्ति स्थापना गर्न महत्त्वपूर्ण भूमिका खेल्ने विश्वास व्यक्त गरेका छन्।

हालैका दिनमा पाकिस्तान, इरान र अमेरिका बीच सन्तुलन कायम गर्दै मध्यस्थकर्ताको भूमिकामा देखिएको छ। विशेषगरी अमेरिकी राष्ट्रपति डोनाल्ड ट्रम्प सँगको सम्बन्ध र छिमेकी इरानसँगको संवेदनशीलताका कारण पाकिस्तानलाई वार्ताको केन्द्र बनाइएको विश्लेषण गरिएको छ।

तेहरान र वासिङ्टन दुवैले ट्रम्पले दिएको कठोर समयसीमा समाप्त हुनुभन्दा एक घण्टा अघि मात्र दुई हप्ते अस्थायी युद्धविराममा सहमति भएको जनाएका छन्। उक्त द्वन्द्व इजरायल र अमेरिकाद्वारा इरानमाथि आक्रमण गरेपछि सुरु भएको थियो। फेब्रुअरी २८ मा इरानका सर्वोच्च नेताको हत्या भएपछि क्षेत्रीय तनाव थप चर्किएको थियो।

त्यसपछि इरानले खाडी क्षेत्रका राष्ट्रहरू र इजरायलमाथि प्रतिआक्रमण गरेको थियो भने इरान समर्थित समूह हेजबुल्लाह ले आक्रमण गरेपछि लेबनान पनि द्वन्द्वमा तानिएको थियो।

प्रधानमन्त्री शरीफका अनुसार लेबनानसहितका केही क्षेत्रमा युद्धविराम लागू भएको छ। तर इजरायलले भने हेजबुल्लाहविरुद्ध सैन्य कारबाही जारी राख्दै उक्त क्षेत्रमा पूर्ण युद्धविराम लागू नभएको दाबी गरेको छ।

ट्रम्पले इरानका पूर्वाधार ध्वस्त पार्ने चेतावनी दिएपछि स्थिति थप गम्भीर बनेको थियो। त्यसलाई रोक्न पाकिस्तानसहित अन्य मध्यस्थकर्ताहरूको पहलमा अस्थायी युद्धविराम सम्भव भएको जनाइएको छ।

यसैबीच टर्की र इजिप्ट ले पनि मध्यस्थता प्रयासमा साथ दिएका छन् भने चीन ले इरानलाई वार्तामा ल्याउन भूमिका खेलेको एएफपीले जनाएको छ।