काठमाडौं । स्वास्थ्य बीमा बोर्डले प्रदेश तथा स्थानीय तहका लागि डिजिटल सामूहिक आबद्धता तथा नवीकरण सेवा सुरु गरेको छ ।
बोर्डले कात्तिक १७ गतेदेखि HIB e–Portal मार्फत उक्त सेवा सञ्चालनमा ल्याएको हो ।

पहिलो चरणमा काठमाडौंको गोकर्णेश्वर नगरपालिका र कपिलवस्तुको कपिलवस्तु नगरपालिकालाई संस्थागत प्रयोगकर्ता पहुँच प्रदान गरी सेवा सुरु गरिएको बोर्डले जनाएको छ ।

नयाँ व्यवस्थाअनुसार प्रदेश सरकार तथा स्थानीय तहले आफ्नै ड्यासबोर्डमार्फत नागरिक र लक्षित लाभग्राहीलाई स्वास्थ्य बीमा कार्यक्रममा सामूहिक रूपमा आबद्ध गराउन तथा नवीकरण गर्न सक्नेछन् ।

त्यसैगरी, यस प्रणालीबाट बीमाको योगदान रकम भुक्तानी र अभिलेख व्यवस्थापनसमेत गर्न सकिनेछ । स्थानीय तहले आफैँ वा दर्ता सहयोगीमार्फत यी सेवा सञ्चालन गर्न सक्ने बोर्डले जनाएको छ ।

बोर्डका प्रवक्ता डा. पवनकुमार साहले डिजिटल प्रणालीमार्फत सामूहिक आबद्धता प्रक्रियालाई सहज, व्यवस्थित, पारदर्शी र प्रविधिमैत्री बनाउने अपेक्षा गरिएको बताएका छन् ।

यसले स्वास्थ्य बीमामा आबद्ध हुने तथा नवीकरण गर्ने प्रक्रियामा लाग्ने समयसमेत घटाउने बोर्डको विश्वास छ । सेवा सञ्चालन गर्न इच्छुक प्रदेश तथा स्थानीय तहलाई बोर्डका सम्बन्धित प्रदेश र जिल्ला कार्यालयसँग समन्वय गर्न आग्रह गरिएको छ ।