बेलारुस । रुसी विदेशमन्त्री सर्गेई लाभरोभले पश्चिमी देशहरूले रुसप्रतिको शत्रुतापूर्ण व्यवहार त्यागेमा सहकार्य गर्न आफ्नो देश तयार रहेको बताएका छन् । तर, युरोपले द्वन्द्वको बाटो रोजेमा त्यसको सामना गर्न रुस पनि तयार रहेको उनले चेतावनी दिएका छन्।

बेलारुसको राजधानी मिन्स्कमा आयोजित युरेसियाली सुरक्षासम्बन्धी चौथो मिन्स्क अन्तर्राष्ट्रिय सम्मेलनलाई सम्बोधन गर्दै लाभरोभले रुसले पश्चिमी देशहरूसँगको सहकार्यका लागि कहिल्यै ढोका बन्द नगरेको बताए ।

रुसले युरोपसँग युद्ध गर्ने कुनै चाहना वा योजना नराखेको स्पष्ट पार्दै उनले युरोपले युद्ध रोजेमा त्यसको सामना गर्न तयार रहेको उल्लेख गरे ।

युरोपसँग प्रत्यक्ष संवादको सम्भावना अझै अनिश्चित रहेको बताउँदै लाभरोभले पश्चिमी देशहरू विश्वव्यापी बहुध्रुवीय व्यवस्थाको वास्तविक प्रवृत्तिबाट टाढिँदै गएको टिप्पणी गरे। बेलारुसको विदेश मन्त्रालयले आयोजना गरेको उक्त सम्मेलनमा करिब ५० देश तथा क्षेत्रका ६०० भन्दा बढी प्रतिनिधिहरू सहभागी भएका छन्।

सम्मेलनको उद्घाटन गर्दै बेलारुसका राष्ट्रपति अलेक्जान्डर लुकासेन्कोले युरेसियामा दिगो सुरक्षा र विकासको साझा मोडेल निर्माण गर्नु व्यावहारिक आवश्यकता भएको बताए । यस्तो व्यवस्थाले विश्वकै हित गर्ने उनको भनाइ थियो।

उनले युरोपभरि बढिरहेको विरोध र असन्तुष्टिलाई गम्भीरतापूर्वक लिनुपर्ने उल्लेख गर्दै युरोपेली संघका सदस्य राष्ट्रहरूलाई सहकार्यका लागि नयाँ बाटो खोज्न आग्रह गरे ।

राष्ट्रपति लुकासेन्कोले युक्रेन संकटले अर्को ठूलो युद्ध निम्त्याउन सक्ने खतरा औँल्याउँदै द्वन्द्वको शान्तिपूर्ण समाधान छिट्टै खोजिने आशा व्यक्त गरे । दुई दिनसम्म सञ्चालन हुने सम्मेलनमा हतियार नियन्त्रण, सुरक्षा क्षेत्रमा नयाँ प्रविधिको भूमिका तथा सामूहिक सुरक्षा सन्धि संगठनको विकासलगायत विषयमा छलफल हुँदैछ।

आर्मेनिया, बेलारुस, कजाकिस्तान, किर्गिस्तान, रुस र ताजिकिस्तान गरी छ सदस्य राष्ट्र रहेको सामूहिक सुरक्षा सन्धि संगठन युरेसियाली क्षेत्रको सामूहिक सुरक्षासँग सम्बन्धित अन्तरसरकारी सैन्य गठबन्धन हो।