काठमाडौं । नेकपा एमालेका सचिव योगेश भट्टराईले माओवादीको सशस्त्र आन्दोलनलाई ‘हिंसा’ भनेपछि संसदमा तनाव भएको छ ।

बुधबारको प्रतिनिधिसभा बैठकमा बोल्ने क्रममा सचिव भट्टराईले माओवादी आन्दोलनलाई ‘हिंसा’ भनेपछि माओवादी सांसदहरुले आपत्ति जनाउँदै विरोध गरेपछि सदनमा तनाव भएको हो ।

एमाले सचिव भट्टराईले माओवादीले संचालन गरेको ‘हिंसा’का कारण मुलुकमा समयमा विद्युत उत्पादन नभएको आरोप लगाएका थिए । माओवादी सांसदले भट्टराईले बोलेको हिंसा शब्द हटाउन माग गरेका छन् ।

उनीहरुले ‘हिंसा’ शब्द संसदको रेकर्डबाट नहटाएसम्म सदन चल्न नदिने बताएपछि तनाव भएको हो । माओवादी केन्द्रका प्रमुख सचेतक हितराज पाण्डेले यसको नियमापत्ति गरेका थिए ।

पाण्डेले भने, ‘यहाँ प्रयोग भएको भाषा संविधान, नियमावलीअनुसार प्रयोग भइरहेको छैन । त्यसकारण हिंसा शब्दलाई रेकर्डबाट हटाउन माग गर्दछु ।’

त्यस्तै माओवादी सचिव देवेन्द्रराज पौडेलले पनि आफूहरु शान्ति प्रक्रियामा आएको भन्दै शान्ति प्रक्रियालाई भड्काउने काम नगर्न चेतावनी दिए ।

त्यसपछि सभामुख घिमिरेले भट्टराईले बोलेका शब्दमाथि छानबिन गर्नका लागि निर्देशन दिएका थिए । तर त्यसपछि पनि एमालेका सचिव भट्टराई र रघुजी पन्तले ‘हिंसा’शब्द पटक पटक दोहोर्याएका थिए ।

माओवादीले भने एमालेका शब्द र व्यवहारको विरोध गरेको थियो । यसरी माओवादीले लगातार त्यसको विरोध गरेपछि भट्टराईले बोलेका शब्दमाथि छानबिन गर्न सभामुख देवराज घिमिरेले संसद सचिवालयलाई निर्देशन दिएका छन् ।