जनकपुरधाम । गृहमन्त्री रमेश लेखकले नेपाल प्रहरीसम्बन्धी विधेयकको मस्यौदा चाँडै संसदमा लगिने बताएका छन् ।

बिहीबार बिहान जनकपुर विमानस्थलमा पत्रकारहरुसँगको कुराकानीमा गृहमन्त्री लेखकले २०१२ सालमा बनेको कानुनलाई परिमार्जन गरी संघीय लोकतान्त्रिक व्यवस्थाअनुसार बनाउन मस्यौदा तयार भइरहेको बताएका हुन् ।

उक्त मस्यौदालाई सहमतिको लागि अर्थ मन्त्रालयमा पठाउने निर्णय भइसकेको उनले बताए । अर्थ मन्त्रालयले सहमति दिएपछि मस्यौदा मन्त्रिपरिषदमा लैजाने गृहमन्त्री लेखकले बताए ।

गृह मन्त्रालयले बनाएको उक्त मस्यौदा संसदबाट पारित भएसँगै प्रहरी समायोजन ऐनअनुसार प्रदेश प्रहरी गठन प्रकृया सुरु हुने उनको भनाइ छ ।

गृहमन्त्रीले भने, ‘नेपाल प्रहरीको ऐन ६९ वर्ष पुरानो भयो, यसमा सामयिक परिमार्जनक आवश्यक छ । नयाँ कानुन निर्माण तथा सङ्गठनात्मक क्षमता बढाएर प्रहरीलाई अझ व्यावसायिक बनाउनुपर्छ । नेपाल प्रहरीसम्बन्धी ऐन परिमार्जन गरेर बजेट व्यवस्थपनका निम्ति त्यो अर्थ मन्त्रालयमा पुगिसकेको छ ।’

वर्तमान सरकार डेलिभरी गर्नकै लागि बनेकाले त्यसमा कुनै सम्झौता नहुने र मुलुकमा शान्ति सुुव्यवस्था कायम हुने उनले बताए ।