काठमाडौँ । नेपाल भलिबल सङ्घले माल्दिभ्सको मालेमा हुने काभा यु–२० महिला भलिबल च्याम्पियनसिप खेल्न जाने नेपाली टोलीलाई बिदाइ गरेको छ । च्याम्पियनसिप यही जुलाई १८ देखि २३ तारिखसम्म हुँदैछ ।

राष्ट्रिय खेलकुद परिषद्का सदस्य—सचिव टङ्कलाल घिसिङ, सहानाप्रधान फाउण्डेसनका अध्यक्ष रामकुमारी झाँक्री, नेपाल भलिबल सङ्घका अध्यक्ष जीतेन्द्रबहादुर चन्द, उपाध्यक्ष भरतबहादुर शाहलगायतले सोमबार आयोजित एक कार्यक्रममा सफलताको शुभकामना दिँदै टोलीको बिदाइ गरे ।

नेपालले पहिलोपटक उमेर समूह काभा यु–२० च्याम्पियनसिप खेल्न लागेको हो । भलिबलको विकासका लागि नेपाल भलिबल सङ्घले उमेर समूहको प्रतियोगिता गराउने र अन्तर्राष्ट्रियस्तरमा पनि सहभागिता गराउने योजना बनाएको छ ।

सेन्ट्रल एसियन भलिबल एशोसिएसन (काभा) को कार्यक्रमअनुसार हुन लागेको प्रतियोगितामा नेपाल, श्रीलङ्का, आयोजक माल्दिभ्स, कीर्गिस्तानगरी कूल चार टोलीको सहभागिता रहेको छ ।

राखेप सदस्य–सचिव घिसिङले पहिलोपटक यु–२० उमेर समूहको महिला टोली अन्तर्राष्ट्रिय प्रतियोगिता खेल्न जान लागेको भन्दै यो राम्रो सुरु भएको र यस टिमबाट भविष्यमा राम्रो प्रदर्शन हुने विश्वास व्यक्त गरे ।

नेपालले पहिलो खेल जुलाई १८ मा श्रीलङ्कासँग खेल्नेछ । यस्तै दोस्रो खेल जुलाई २० मा कीर्गिस्तानसँग र तेस्रो खेल माल्दिभ्ससँग खेल्ने तालिका छ । सिङ्गल राउण्ड रोविनका आधारमा सबै टिमले एकापसमा खेलेपछि सेमिफाइनल खेल हुनेछ । लिगमा पहिलो हुने र चौथो हुने तथा दोस्रो हुने र तेस्रो हुनेबीच सेमिफाइनलमा प्रतिस्पर्धा हुनेछ । फाइनल खेल जुलाई २३ मा हुनेछ ।

नेपालले काभा यु–२० महिला भलिबल च्याम्पियनसिपको उपाधि जित्ने लक्ष्य राखेको छ । नेपाली टोली भोलि माल्दिभ्स प्रस्थान गर्र्दैछ । नेपाली टोलीमा सलिना बुढामगर, जेनिशा विश्वकर्मा, एलिसा मानन्धर, निशा महर, भावना तामाङ, एञ्जिला प्रधान, निशा चौधरी, आरती चौधरी, मिना सुनार, अनुषा चौधरी, स्नेहा ठगुन्ना र आशिका क्षेत्री छन् । मुख्य प्रशिक्षकमा कुमार राई, सहायक प्रशिक्षकमा अर्जुन घिमिरे र व्यवस्थापकमा जुनु पुन रहेका छन् ।