काठमाडौं । काठमाडौं महानगरपालिकाका मेयर बालेन साहले नाबालिगलाई घरेलु कामदारको रुपमा हिंसा गर्ने एमाले सांसद रेखा शर्मालाई कारबाही गर्न माग गरेका छन् ।

आइतबार सामाजिक संजालमार्फत मेयर साहले प्रदेश सांसद शर्मालाई दुई महिनादेखि महानगरले आग्रह गर्दा पनि सरकारले कारबाही नगरेको भन्दै आपत्ति जनाएका हुन् ।

उनले भनेका छन्, ‘उहाँ हुनुहुन्छ नेकपा एमालेकी प्रदेश सांसद रेखा शर्मा, उहाँले विगत ८ वर्षदेखि बन्दी बनाएर एक जना नाबालिकालाई घरेलु कामदारको नाममा हिंसा गर्दै आउनुभएको छ । दैनिक रुपमा कुटपिट गर्दै आउनुभएको छ। काठमाडौँ महानगरले विगत २ महिनादेखि कारबाही अगाडि बढाउनु भन्दा पनि यो सरकारले समाएको छैन।’

उनले प्रधानमन्त्री केपी शर्मा ओलीलाई सांसद शर्मालाई कहिले समाउने भन्दै प्रश्न गरेका छन्। उनले भनेका छन्, ‘सम्माननीय प्रधानमन्त्री खड्ग प्रसाद ओलीज्यू, सुशासन भनेको अदालतले नि समाउ भनेको तपाईंको सांसद रेखा शर्मा जसलाई बाल शोषण गरेको मुद्दा छ समाउन लाई भन्दछ । सायद तपाईंको लागि सुशासनको अर्थ सो बालिकाको मृत्यु पछि गोहिको आँसु चुहाएर फेसबुकमा समवेदना दिदै एक लाख घोषणा गर्नुनै होला । कहिले समाउने ?? कि नसमाउने ??’