काठमाडौँ । सरकारले काठमाडौं उपत्यकाबाट विस्थापित भएका सुकुम्बासीका लागि एकमुष्ट २५ हजार खर्च उपलब्ध गराउने निर्णय गरेको छ । मंगलबार बसेको मन्त्रिपरिषद बैठकले वैकल्पिक बसोबासको व्यवस्था गर्न २५ हजार रुपैयाँ दिने निर्णय गरेको सरकारका प्रवक्ता सस्मित पोखरेलले जानकारी दिए ।

उनले भने, ‘विस्थापित व्यक्तिहरूको विवरण रुजु गरी प्रति परिवार पुनस्र्थापनाका लागि २५ हजार रुपैयाँ उपलब्ध गराउने भएको निर्णय भएको छ ।’

वृद्ध, असहाय र अपाङ्गलगायत आफ्नो व्यवस्थापन गर्न नसक्ने परिवारलाई तोकिएको होल्डिङ सेन्टरमा व्यवस्था गर्ने र बालबालिका, विद्यार्थीको पठनपाठन र स्वास्थ्य सेवा स्थानीय तहसँगको समन्वयमा व्यवस्था गर्ने निर्णय भएको पोखरेलले बताए ।

त्यस्तै बैठकले चीन र स्वीटजरल्यान्डबाट प्राप्त हुने अनुदान रकम स्वीकार गर्ने निर्णय गरेको छ । अर्थ मन्त्रालयबाट आएको प्रस्तावअनुसार नगरपालिका राजस्व अभिवृद्धि परियोजनाका लागि स्वीटजरल्यान्ड सरकारबाट प्राप्त हुने ६.११६ मिलियन स्वीस फ्र्यांक स्वीकार गर्ने निर्णय गरेको हो ।

त्यस्तै, अरनिको राजमार्ग मर्मत तथा सुधारका लागि चीन सरकारले दिने ७९. ३६ मिलियन आरएमबी अनुदान रकम पनि स्वीकार्ने निर्णय भएको छ ।