सियोल । उत्तर कोरियाकी पूर्व प्रथम महिलासम्बन्धी उच्च–प्रोफाइल मुद्दामा जेल सजाय दोब्बरभन्दा बढी गर्ने निर्णय गरेका  न्यायाधीश मृत फेला परेका छन् । घटनाले न्यायिक वृत्तमा चासो र चिन्ता दुवै बढाएको छ ।

प्रहरीका अनुसार सिन जोङ–ओ सियोल उच्च अदालत भवनभित्र मङ्गलबार राति करिब १ः०० बजे  बेहोस अवस्थामा फेला परेका थिए । सेओचो जिल्ला प्रहरी कार्यालयका अनुसन्धान अधिकारीले उनलाई तुरुन्त अस्पताल लगिएको र त्यहाँ मृत घोषित गरिएको जानकारी दिएका छन् । प्रारम्भिक अनुसन्धानमा कुनै पनि बाह्य हस्तक्षेप वा आपराधिक गतिविधिको सङ्केत नदेखिएको प्रहरीले जनाएको छ ।

यद्यपि केही स्थानीय मिडियाले न्यायाधीशले आत्महत्याको नोट छोडेको दाबी गरे पनि अनुसन्धान अधिकारीले भने त्यस्तो कुनै नोट फेला नपरेको स्पष्ट पारेका छन् । घटनाको विस्तृत कारणबारे थप अनुसन्धान जारी रहेको बताइएको छ ।

सिन जोङ–ओले गत महिनामात्रै ५३ वर्षीया किम केओन ही को पुनरावेदन मुद्दाको अध्यक्षता गरेका थिए। सो मुद्दामा उनले किमलाई स्टक हेरफेर र घुसखोरीको दोषी ठहर गर्दै उनको जेल सजाय २० महिनाबाट बढाएर चार वर्ष पुर्याउने फैसला सुनाएका थिए।

उक्त फैसला तल्लो अदालतले उनलाई पहिले दिएको रिहाइ निर्णय उल्ट्याउने ऐतिहासिक निर्णय मानिएको थियो । त्यस क्रममा न्यायाधीश सिनले किमले आफ्नो दोष स्वीकार गर्नुको सट्टा निरन्तर बहानाबाजी गरेको टिप्पणी पनि गरेका थिए ।

प्रहरी अधिकारीले बुधबार जानकारी दिँदै न्यायाधीशको परिवार गहिरो शोकमा रहेको र उनीहरूले गोपनीयता कायम राख्न अनुरोध गरेको बताएका छन् । घटनाले दक्षिण कोरियाली न्याय प्रणाली र हालैका संवेदनशील मुद्दाहरूबारे पुनः प्रश्न उठाएको छ ।