काठमाडौँ । नेपाली राष्ट्रिय पुरुष फुटबल टिमले घरेलु मैदानमा २ वर्षपछि अन्तर्राष्ट्रिय खेल खेल्दै छ। नेपाली टिम घरेलु मैदानमा अन्तर्राष्ट्रिय प्रतियोगिता खेल्न निकै उत्साहित छ। महिला टोली र क्लब स्तरको खेल भए पनि नेपाली राष्ट्रिय पुरुष टिमले भने २ वर्षपछि घरेलु मैदानमा उत्रिन लागेको हो।

शुक्रबार आयोजित प्री-म्याच प्रेस कन्फ्रेन्समा नेपालका प्रशिक्षक म्याट रोसले नेपाली टिम जितको लागि मैदानमा उत्रने बताए। ‘हामी जित्न तयार छौँ। जसका लागि खेलाडीहरू शतप्रतिशत तयार छन्। हामी घरेलु मैदानमा जित निकाल्न चाहन्छौँ,’ उनले भने। बंगलादेशको टिम बलियो भएकाले प्रतिस्पर्धात्मक खेल हुने प्रशिक्षक रोसको भनाइ छ।

नेपाली टिम मैत्रीपूर्ण खेलमा बंगलादेशलाई पराजित गर्दै त्यही मोमेन्टम लिएर एएफसी एसिया कप छनोट खेल्न चाहेको प्रशिक्षक रोसले बताए। ‘हामी जित्न चाहन्छौँ र सोही मोमेन्टम ३ महिनासम्म कायम राख्दै एसियन कप छनोट खेल्नेछौँ।’

नेपालले २०२३ को नोभेम्बरयता घरेलु दर्शकको साथमा खेल खेल्न पाएको थिएन। घरेलु दर्शकको साथमा मैदानमा उत्रन आफूहरू निकै उत्साहित रहेको कप्तान किरण कुमार चेम्जोङले बताए। ‘वर्षपछि हामी हाम्रो मैदानमा खेल्दै छौँ। आशा छ, धेरैभन्दा धेरै समर्थकहरू आएर हामीलाई समर्थन गर्नुहुन्छ,’ उनले भने। यसो भन्दै गर्दा उनलाई नेपाली दर्शकका अगाडि खेल्न निकै मन पर्ने उनले बताए।

नेपालको टिममा डिफेन्डर सनिश श्रेष्ठलगायत यु-२३ टिममा रहेका आयुष घलान, कृतिश रत्न छुन्जु, सुमित श्रेष्ठ छैनन्। तर, नेपाली टिममा युवा खेलाडीहरू बढिरहेका छन्। यु-२० टिमका कप्तानको रूपमा उमेर समूहको खेल खेलेका कुशल देउवा, सुवास बमजस्ता खेलाडी रहेका छन्। यस विषयमा प्रशिक्षक म्याट रोस भन्छन्, ‘युवा खेलाडीहरू पनि उत्तिकै तयार र बलियो मानसिकता भएका छन्।’