काठमाडौं । नेपाली कांग्रेसले पूर्वमन्त्रीले काम गराउन पाँच हजार घुस दिनुपरेकोबारेमा सरकारको ध्यानाकर्षण गराएको छ ।

मंगलबारको प्रतिनिधिसभा बैठकमा नेपाली कांग्रेसका सांसद राजेन्द्र केसीले पूर्वमन्त्री वीरेन्द्र महतोले काम गराउन पाँच हजार घुस दिएकोबारे सरकारको ध्यानाकर्षण गराएका हुन् ।

उनले यस विषयमा शिक्षा, गृहमन्त्री र प्रधानमन्त्रीलाई रुलिङ गराई तीन दिनभित्र संसदमा जानकारी गराउन सभामुखसमक्ष माग गरे ।

उनले भने, ‘यही साउन ६ गते प्रधानमन्त्रीले विश्वासको मत लिँदै गर्दा सांसदले पाँच हजार घुस दिएर आएको कुरा संसदमा बोल्नु भएको थियो । उहाँले आफ्नो छोराको सर्टिफिकेट प्रमाणिकरणका लागि पाँच हजार घुस दिएको अभिव्यक्ति दिनुभयो। यस विषयमा सभामुखबाट रुलिङ हुनेछ भन्ने लागेको थियो । तर हुन सकेन । तीनभित्र यस विषयमा संसदमा जानकारी गराउन आग्रह गर्न चाहन्छु ।’

उनले घुस दिने र लिनेबीच छानबिन हुनुपर्ने बताए । उनले भने, ‘मेरो आसय घुस दिने शुत्र हुन् भन्ने होइन। तर, यत्रो काण्डमा पनि संसद स्तब्ध भएर बसेको छ। घुस खानेहरू बसिरहेका छन्। त्यसैले यो विषयमा छानबिन हुनुपर्छ।’

साउन ६ गतेको प्रतिनिधिसभा बैठकमा पूर्वमन्त्री महतोले शिक्षा मन्त्रालयअन्तर्गत रहेको सानोठिमी कार्यालयमा छोराको सर्टिपिकेट ’समकक्षता’ आफूले ५ हजार घुस दिएको बताएका थिए ।