काठमाडौं । नेकपा एमालेका सांसद ठाकुर गैरेले सरकार अल्पमतमा परिसकेकाले तत्काल राजीनामा दिन प्रधानमन्त्री प्रचण्डलाई आग्रह गरेका छन् ।

सोमबारको प्रतिनिधिसभा बैकठमा सांसद गैरेले अल्पमतमा परिसकेका प्रधानमन्त्रीलाई एक सेकेण्ड पनि अब सरकारमा बस्न नमिल्ने बताएका हुन् ।

उनले देशमा बाढी पहिरोको जोखिम बढेको बेला मुलुकलाई फेरि अस्थिरतातर्फ धकेल्न प्रधानमन्त्रीले संविधानको छिद्र खोजेको आरोप लगाए ।

उनले भने, ‘बहुमत गुमेको प्रधानमन्त्रीले सेकेन्ड पनि बस्ने अधिकार रहँदैन । देशमा आइपरेको विपद् व्यवस्थापन गर्न प्रधानमन्त्रीले सहजता प्रदान गर्नु राम्रो हुन्छ । तर अर्को सरकारलाई अस्थिरता, बेथिति, विभाजनतर्फ लैजान सकिन्छ कि भनेर प्रयत्न गर्दै हुनुहुन्छ। देशमा यस्तो अवस्था हुँदा प्रधानमन्त्रीज्यू संविधानमा प्वाल खोजिरहनुभएको छ। देशलाई अस्थिरतामा लान सकिन्छ कि भनेर प्रयत्न गरिरहनुभएको छ ।’

उनले प्रधानमन्त्री प्रचण्डलाई ‘उडायो सपना सबै हुरीले’ भन्ने गीत गाउन सुझाव दिए । उनले भने, ‘सरकार घोर अल्पमतमा परेको छ, यस्तो पनि हुँदो रहेछ कहिले कहिले, भन्दै गीत गाएर बसेको छ। बरू, उडायो सबै सपना हुरिले भन्ने गीत गाए हुने नि।’