काठमाडौँ । अखिल नेपाल फुटबल सङ्घको आयोजनामा यही असार ३० गतेदेखि हुने ललित स्मृति एन्फा यु–१८ युथ लिगको विजेताले एक लाख प्राप्त गर्ने भएको छ ।

बुधबार आयोजित पत्रकार सम्मेलनमा अखिल नेपाल फुटबल सङ्घ (एन्फा)का उपाध्यक्ष तथा लिग संयोजक दीपक खतिवडाले लिग विजेताले  एक लाख तथा उपविजेतालाई ५० हजार प्रदान गरिने घोषणा गरे । उनका अनुसार विधागततर्फ उत्कृष्ट हुनेलाई  १५ हजार प्रदान गरिनेछ ।

संयोजक खतिवडाले प्रतियोगिताको तयारीबापत सहभागी क्लबले तीन लाख ५० हजार प्राप्त गरिने र लिगका सम्पूर्ण खेल सातदोबाटोस्थित एन्फा मुख्यालय मैदानमा  आयोजना गरिने जानकारी दिए ।

यही असार ३० गतेदेखि सुरू हुने लिगको उद्घाटन खेलमा न्युरोड टिम (एनआरटी) र चर्च ब्वाइज युनाइटेड भिड्ने भएका छन् । उक्त खेल दिउँसो १ बजे सुरू हुनेछ ।

प्रतियोगितामा गत संस्करणमा ‘ए’ डिभिजन खेलेका एपिएफ फुटबल क्लब, चर्च ब्वाइज युनाइटेड, एफसी खुमलटार, जावलाखेल युथ क्लब र मच्छिन्द्र फुटबल क्लबले प्रतिस्पर्धा गर्नेछन् । यसैगरी मनाङ मस्र्याङ्दी क्लब, नेपाल पुलिस क्लब, न्युरोड टिम, सङ्कटा क्लब, सातदोबाटो युथ क्लब, थ्रीस्टार क्लब र त्रिभुवन आर्मी फुटबल क्लब पनि प्रतिस्पर्धामा सहभागी हुने आयोजकले जनाएको छ ।