काठमाडौं । नेपाली कांग्रेसका महामन्त्री गगन थापाले जादुगरजस्तो उफ्रिने काम प्रधानमन्त्री पुष्पकमल दाहाल प्रचण्डलाई छोडिदिन आग्रह गरेका छन् ।

मंगलबार काठमाडौंमा नेपाल लोकतन्त्रवादी आदिवासी जनजाति महासंघको महाधिवेशनलाई सम्बोधन गर्दै महामन्त्री थापाले जादुगरजस्तो उफ्रिने काम प्रधानमन्त्रीलाई छाडेर कांग्रेस पार्टी निर्माणमा लाग्नुपर्ने बताएका हुन् ।

उनले कांग्रेसले आगामी निर्वाचनमा कम्तिमा एक सय सिट ल्याउने गरी लाग्न पार्टीका नेता कार्यकर्ताहरुलाई आग्रह गरे । उनले भने,’सरकारति हामी हेर्दै नहेरौं । यता मिल्ने, उता मिल्ने, ऊसँग मिल्ने कुरा छोडिदिऔँ । म जादुगर हो भनेको जस्तो गरी यता उफ्रिने, उता उफ्रिने काम प्रधानमन्त्रीलाई छोडिदिऔँ ।’

महामन्त्री थापाले २०८४ सम्म कांग्रेसले सरकारतिर फर्किएर हेर्नै नहुने र योबीचमा पार्टी निर्माणमा लाग्नुपर्ने बताए । उनले भने,’अहिले जसले सरकार चलाएका छन् चलाउन दिऔँ । सरकारतिर हामीले हेर्दै नहेरौँ । र, यत्ति राम्रोसँग हामी पार्टी निर्माण गरौँ कि २०८४ सालमा कम्तीमा पनि सय सिट जित्ने गरी ।’