काठमाडौँ । प्रधानमन्त्री बालेन साहले बुद्धले देखाउनुभएको बाटो दुःख निवारणको बाटो भएको बताएका छन् । बुद्ध जयन्तीका उपलक्ष्यमा प्रधानमन्त्रीले बुद्ध बचन उदृत गर्दै यस्तो बताएका हुन् ।

उनले भनेका छन्, ‘बुद्धले भन्नुभयो ‘दुःख छ, दुःखको कारण छ, दुःखको निवारण छ, दुःख निवारण गर्ने मार्ग छ।’ बुद्धले देखाउनुभएको बाटो दुःख निवारणको बाटो हो। उज्यालोको अभाव नै अँध्यारो हो; जतिबेला उज्यालोको किरणले पाइला टेक्छ, अँध्यारो स्वतः बिलाएर जान्छ। हाम्रो यात्रा त्यस्तै ज्ञानको उज्यालोको खोजमा हुनुपर्छ, समस्या निवारणको मार्गमा हुनुपर्छ।’

त्यस्तै प्रधानमन्त्रीले साँचो क्रान्ति ‘क’ बाट ‘ज्ञ’ बाट शुरू हुने बताएका छन् । उनले भनेका छन्, ‘शान्तिका सर्वकालीन महान् प्रवर्तक बुद्धको जन्मजयन्तीको अवसरमा विश्वशान्तिको कामना गर्दछु। बुद्धको जन्मले धन्य हाम्रो नेपाल भूमि सदैव अहिंसा र शान्तिको पक्षमा छ। साँचो क्रान्ति ‘क’ बाट होइन ‘ज्ञ’ बाट शुरू हुन्छ, र त्यो “ज्ञ“ ज्ञान हो । बुद्ध जयन्तीको सुअवसरमा सम्पूर्णमा प्रज्ञामय शुभकामना। अप्प दीपो भवः।’