एजेन्सी । फिल साल्टको शानदार शतकमा इंग्ल्याण्डले वेस्ट इन्डिजसँगको पहिलो टी-२० सिरिजमा ८ विकेटको जित हात पारेको छ।

वेस्ट इन्डिजले दिएको १८३ रनको लक्ष्य इंग्ल्याण्डले १९ बल बाँकी रहँदा दुई विकेटको क्षतिमा पुरा गरेको हो। अविजित रहेका साल्टले ५४ बलमा १०३ रन जोडे। उनको पारीमा ९ चौका र ६ छक्का समावेश थियो।

यसैगरी ज्याकोब बेथेलले ३६ बलमा ५८ रन जोडे। वेस्ट इन्डिजका अकेल हुसेनले कुनै विकेट नलिए पनि किफायती बलिङ गर्दै ४ ओभरमा २० रन मात्र खर्चिए।

यसअघि टस हारेर पहिले ब्याटिङ गरेको वेस्ट इन्डिजले ९ विकेटको क्षतिमा १८२ रनको योगफल खडा गरेको थियो। सो टोलीका लागि निकोलास पूरणले सर्वाधिक २९ बलमा ३८ रन जोडे। आन्द्रे रसेलले १७ बलमा ३० तथा गुडाकेस मोटेले १४ बलमा ३३ रन जोडे। उनको पारीमा चार चौका र दुई छक्का समावेश थियो। रोमारियो सेफर्ड २२ बलमा ३५ रन बनाउँदै अविजित रहे।