मस्को । रुसले जापानी बहुराष्ट्रिय कम्पनी जापान टोबाको इन्टरनेसनल (जेटीआई) को रूसी सम्पत्ति आफ्नो नियन्त्रणमा लिने निर्णय गरेको छ । राष्ट्रपति भ्लादिमिर पुटिनले बिहीबार एक निर्देशन जारी गर्दै कम्पनीका सम्पत्ति अस्थायी प्रशासनमा राख्न आदेश दिएका हुन् ।

जापानी पत्रकारलाई जासुसीको आरोपमा पक्राउ गरिएपछि जापान र रुसबीचको सम्बन्ध थप तनावपूर्ण बनिरहेका बेला मस्कोले यस्तो कदम चालेको हो ।

पुटिनद्वारा जारी निर्देशनमा जेनेभास्थित मुख्यालय रहेको जेटीआईको रूसी सञ्चालनअन्तर्गतका औद्योगिक सम्पत्ति (इन्डस्ट्रियल एसेट्स) एक रुसी कम्पनीलाई हस्तान्तरण गर्ने उल्लेख छ ।

अन्तर्राष्ट्रिय प्रतिबन्धको जवाफमा रुसले विदेशी कम्पनीका सम्पत्ति तथा व्यवसाय आफ्नो नियन्त्रणमा लिने अभियान चलाउँदै आएको छ । यसअघि स्विस खाद्य कम्पनी नेस्ले र फ्रान्सेली सुपरमार्केट समूह अउसानले पनि रुसमा यस्तै परिस्थितिको सामना गर्नुपरेको थियो । उक्त अभियानबाट धेरै युरोपेली कम्पनीले आफ्ना रूसी व्यवसाय गुमाएका छन् ।

युक्रेनमाथि सन् २०२२ मा पूर्णस्तरको आक्रमण सुरु गरेपछि सयौँ विदेशी कम्पनीले रुसी बजार छाडेका थिए । तर, केही कम्पनीले भने त्यहाँ आफ्नो व्यवसाय सञ्चालन जारी राखेका छन् ।

रुसले आफूले ‘मित्रवत् नभएका’ ठानेका देशका कम्पनीमाथि आर्थिक प्रतिबन्ध लगाउँदै आएको छ । ती देशले युक्रेन युद्धका कारण मस्कोमाथि प्रतिबन्ध लगाएपछि रुसले लाभांश भुक्तानीमा रोक लगाउनुका साथै व्यवसाय बेचेर बाहिरिन चाहने विदेशी कम्पनीमाथि उच्च बहिर्गमन कर लगाएको छ । यसका कारण कतिपय कम्पनीले आफ्ना रूसी सम्पत्ति स्थानीय व्यवस्थापनलाई सुम्पेर बाहिरिनुपरेको छ ।

जापानले पनि युक्रेनमाथिको रुसी आक्रमणपछि मस्कोविरुद्ध लगाइएका अन्तर्राष्ट्रिय प्रतिबन्धमा साथ दिएको छ । यसबाहेक प्रशान्त महासागरका केही द्वीपको स्वामित्वलाई लिएर जापान र रुसबीच दशकौँदेखि विवाद रहँदै आएको छ ।

यसैबीच, रुसी सुरक्षा सेवा (एफएसबी) ले गत महिना जापानी समाचारपत्र होक्काइदो शिम्बुनका पत्रकार युकी इमाईलाई जासुसी गतिविधिमा संलग्न रहेको आरोपमा पक्राउ गरेको थियो । मस्कोले जापानले आफ्नो देशभित्र जासुसीका लागि व्यवस्थित रूपमा पत्रकार प्रयोग गर्ने गरेको आरोपसमेत लगाएको छ । तर, जापानले रुसी पक्षका आरोप अस्वीकार गर्दै आएको छ ।