काठमाडौं । नेपाली कांग्रेसकी नेतृ उर्मिला कंडेलले १५औँ महाधिवेशनमा केन्द्रीय सदस्य पदमा उम्मेदवारी दिने भएकी छन्। धादिङबाट महाधिवेशन प्रतिनिधिमा निर्वाचित कंडेलले पार्टीको केन्द्रीय तहमा आफ्नो भूमिका विस्तार गर्ने उद्देश्यसहित केन्द्रीय सदस्यमा प्रतिस्पर्धा गर्न लागेकी हुन्।

कंडेलको राजनीतिक यात्रा नेपाल विद्यार्थी संघ (नेविसंघ) बाट सुरु भएको हो। विद्यार्थी राजनीतिमा सक्रिय हुँदै कांग्रेसको मूलधारमा प्रवेश गरेकी उनले लामो समयदेखि पार्टीको संगठन निर्माण र राजनीतिक गतिविधिमा निरन्तर सक्रियता देखाउँदै आएकी छन्।

कांग्रेसका १३औँ र १४औँ महाधिवेशनमा महाधिवेशन प्रतिनिधिका रूपमा सहभागी भइसकेकी कंडेलले पार्टीको बागमती प्रदेश सदस्यको जिम्मेवारीसमेत सम्हालेकी छन्। पार्टीका विभिन्न तहमा काम गर्दै संगठन र कार्यकर्तासँगको सम्बन्धलाई निरन्तरता दिएकी उनी यसपटक धादिङबाट १५औँ महाधिवेशनका लागि महाधिवेशन प्रतिनिधिमा निर्वाचित भएकी हुन्।

विद्यार्थी संगठनबाट सुरु भएको राजनीतिक यात्रालाई अब पार्टीको केन्द्रीय तहसम्म पुर्‍याउने लक्ष्यसहित आफूले उम्मेदवारी अघि बढाएको कंडेल बताउँछिन्। लामो समय पार्टी संगठनमा काम गरेको अनुभवलाई केन्द्रीय नेतृत्वमा उपयोग गर्दै कांग्रेसलाई थप सुदृढ र प्रभावकारी बनाउन भूमिका खेल्ने उनको भनाइ छ।

कंडेलले आफ्नो राजनीतिक प्राथमिकतामा महिला सहभागिता, संगठन सुदृढीकरण र कार्यकर्ताको भूमिकालाई थप प्रभावकारी बनाउने विषयलाई राखेकी छन्। पार्टीको नीति निर्माण र निर्णय प्रक्रियामा महिलाको अर्थपूर्ण सहभागिता बढाउनुपर्ने उनको धारणा छ।

नेविसंघको राजनीतिबाट कांग्रेसको मूलधारमा प्रवेश गरेकी कंडेलले विभिन्न जिम्मेवारी हुँदै प्रदेश तहको भूमिका सम्हालिसकेकी छन्। १५औँ महाधिवेशनमा केन्द्रीय सदस्यका लागि अघि बढेको उनको उम्मेदवारीले उनको लामो राजनीतिक यात्रालाई पार्टीको केन्द्रीय नेतृत्वसँग जोड्ने प्रयासका रूपमा देखिएको छ।