काठमाडौं । नेपालमै पहिलोपटक १ हजार १ सय ११ साधक बटुकद्वारा सञ्चालित अतिरुद्र विश्वकल्याण विराट महायज्ञ सम्पन्न भएको छ । प्रदर्शनी मार्गस्थित भृकुटीमण्डपमा कात्तिक २१ गतेदेखि आयोजना भएको महायज्ञमा दैनिक १० हजारभन्दा बढी श्रद्धालु भक्तजनहरुले उपस्थिति जनाएको आयोजक नेपाल महर्षि वैदिक फाउण्डेसनले जनाएको छ ।

फाउण्डेसनका अध्यक्ष दीपकप्रकाश बाँस्कोटाले महायज्ञमार्फत नेपालले विश्वशान्तिक र वैदिक विचारको प्रबर्धनमा महत्वपूर्ण योगदान गरेको बताउनुभयो । ‘यो महायज्ञले नेपाल र नेपालीको शिर उँचो बनाएको छ । हाम्रो वैदिक र यज्ञ परम्पराको विश्वभर ध्यानाकर्षण भएको छ’m बाँस्कोटाले भन्नुभयो । उहाँले महायज्ञका दौरान आयोजिक प्रांगारिक कृषि मेला, वैदिक तथा आधुनिक विज्ञान सम्मेलन एवं भावातीत ध्यान शिविर पनि सफलताका साथ सम्पन्न भएको बताउनुभयो । महायज्ञका दौरान दैनिक १ हजार १ सय ११ वैदिक बटुकहरुबाट विधिपूर्वक रुद्राभिषेक गरिएको थियो भने १५ लाख दीप प्रज्जवलन गरिएको थियो ।

महायज्ञको समापन समारोहमा बोल्दै विश्व हिन्दु महासंघका अध्यक्ष डा. रामचन्द्र अधिकारीले नेपालमा धर्म रुपान्तरणको बढ्दो क्रम रोक्न आह्वान गर्नुभयो । उहाँले हिन्दु धर्मले विश्वलाई नेतृत्व गर्न सक्ने भएकाले नेपाललाई संसारको गुरुराष्ट्र बनाउने अभियान सफल पार्नुपर्ने बताउनुभयो ।