काठमाडौं । सहकारी संस्था वचत रकम दुरुपयोग सम्बन्धमा गठित संसदीय छानबिन विशेष समितिले सुप्रिम वचत तथा ऋण सहकारी संस्थाका पूर्वसचिव दीपेशकुमार पुनसँग सोधपुछ गरेको छ ।

शुक्रबार समितिले पूर्वउपराष्ट्रपति नन्दबहादुर पुनका पुत्र दीपेशसँग सोधपुछ गरेको हो । पछिल्ला दिनमा समितिले सहकारीको वचत दुरुपयोग गरेको अभियोगमा थुनामा रहेका र अन्य आरोपीसँग सोधपुछ गरिरहेको छ ।

समितिले बिहीबार ओरियन्टल,प्यासिफिक सेभिङ, कोहिनुर हिल, कन्जुमर र भेगास वचत तथा ऋण सहकारी संस्थाका अध्यक्ष तथा मुख्य संचालक सुधिर बस्नेतसँग सोधपुछ गरेको थियो । त्यस्तै, सुप्रिम वचत तथा ऋण सहकारी बुटवलका अध्यक्ष ओमप्रकाश गुरूङलाई भैरहवा कारागारबाट झिकाएर सोधपुछ गरेको थियो ।

त्यस्तै सुप्रिपमकै क्यासियर पदमा कार्यरत रोशनी गुरूङलाई पनि समितिले सोधपुछ गरेको थियो । समितिले केहीदिनअघि पोखराको सूर्यदर्शन सहकारीको बचत अपचलनको आरोपमा थुनामा रहेका भविश्वर अर्याल, शिवकुमार गुरूङ(महेन्द्र भोटे), कुमार रम्तेललगायत अन्य सहकारीका संचालकहरुसँग पनि सोधपुछ गरेको छ ।