अस्टिन, टेक्सस — अन्यायविरुद्ध बोल्ने, जनजीवनमा काम लाग्ने विषय उठाउने र उपयोगी जानकारी बाँड्ने उद्देश्यसहित माधव थापा डिजिटल माध्यममा सक्रिय छन्। ‘थापा काजी अफिसियल’ नामबाट छोटा जानकारीमूलक भिडियो र पोडकास्ट प्रस्तुत गर्दै आएका उनले अमेरिकी जीवनका व्यावहारिक पक्षदेखि सामाजिक विकृति र नेपालको राजनीतिक घटनाक्रमसम्मका विषय समेट्दै आएका छन्।
चार वर्षअघि अमेरिका आएका थापाले झन्डै दुई वर्षदेखि कन्टेन्ट बनाउँदै आएको बताए। समाजमा भइरहेका विकृति, विसंगति र अन्यायका घटनाले आफूलाई सार्वजनिक रूपमा बोल्न प्रेरित गरेको उनको भनाइ छ। आफ्ना समस्या खुलेर राख्न नसक्ने व्यक्तिहरूका कुरा बाहिर ल्याउनुपर्छ भन्ने सोचबाट यो यात्रा सुरु भएको उनले बताए।
“अन्यायमा परेका व्यक्तिहरूको आवाज बनेर मैले पनि बोल्नुपर्छ भन्ने लाग्यो। त्यही सोचबाट सुरु गरेको हुँ,” समाज प्रेससँगको कुराकानीमा थापाले भने।
उनका अनुसार, सामग्री बनाउँदा दर्शकको दैनिक जीवनमा उपयोगी हुने विषयलाई प्राथमिकता दिने गरिएको छ। मानिसले भोगिरहेका अप्ठ्यारा, जानकारीको अभावमा हुने अलमल र समाजमा छलफल हुनुपर्ने विषयलाई आफ्ना प्रस्तुतिमा समेट्ने प्रयास गरिरहेको उनले बताए।
अमेरिकामा बस्दा के गर्न मिल्छ, के गर्न हुँदैन, कुन कुरामा सावधानी अपनाउनुपर्छ र के गर्दा दैनिक काम सहज हुन्छ भन्नेजस्ता विषय उनका छोटा भिडियोमा समेटिन्छन्। आर्थिक विषयका सुझाव, सामाजिक सचेतना र समयअनुसारका घटनाक्रमबारे पनि सामग्री बनाउने गरेको उनले बताए। नेपालको राजनीतिक अवस्थाबारे समेत बेलाबेला आफ्ना धारणा राख्ने गरेका छन्।
‘थापा काजी अफिसियल’ उनका भिडियो र पोडकास्टको साझा परिचय बनेको छ। आफ्नै थर ‘थापा’सँग नेपाली सम्बोधन ‘काजी’ जोडिएको यो नाममार्फत उनी विभिन्न डिजिटल माध्यममा दर्शकसँग जोडिएका छन्। उनको सार्वजनिक लिंक सूचीमा टिकटक, फेसबुक, युट्युब र इन्स्टाग्राम समावेश छन्।
छोटा जानकारीमूलक भिडियोसँगै थापाले करिब डेढ वर्षदेखि पोडकास्ट पनि सञ्चालन गर्दै आएका छन्। उनको युट्युब च्यानलको परिचयमा अनुभव आदानप्रदान, प्रेरणादायी प्रसंग र खुला कुराकानीलाई प्राथमिकता दिइएको छ।
उनको वेबसाइटमा समावेश सामग्रीमा टंक दाहालसँग नेपालको पत्रकारिता र राजनीतिबारे गरिएको संवाद, दाहालसँगै माइक्रोसफ्ट मुख्यालयको भ्रमण तथा ज्योति केसीको यात्रा र जीवनका सिकाइसम्बन्धी कुराकानी छन्। व्यवसाय, उद्यमशीलता र विभिन्न क्षेत्रका व्यक्तिका अनुभव पनि उनका पोडकास्टका विषय बनेका छन्।
सामग्री प्रस्तुत गर्नुअघि त्यसको तथ्य जाँच्ने गरेको थापाले बताए। उनका अनुसार, कुनै जानकारी भेट्नेबित्तिकै सार्वजनिक गर्नुभन्दा अन्य स्रोतसँग तुलना गरेर पुष्टि गर्ने प्रयास गरिन्छ। दर्शकमाझ सही जानकारी पुर्याउन विषयको आधार र सन्दर्भ स्पष्ट हुनुपर्नेमा उनी जोड दिन्छन्।
“मैले क्रस भेरिफाई गर्छु, तथ्यहरू जाँच्छु। दर्शकमाझ ल्याउनुअघि पुष्टि गरेर मात्रै प्रस्तुत गर्ने प्रयास गर्छु,” उनले भने।
समाज प्रेससँग कुरा गर्दै थापाले आफूले दिएको जानकारीले दर्शकको बुझाइमा प्रभाव पार्न सक्ने भएकाले जिम्मेवार रूपमा प्रस्तुत हुनुपर्ने बताए। विशेषगरी आर्थिक विषय, सार्वजनिक घटना र दैनिक व्यवहारसँग जोडिएका जानकारीमा सावधानी आवश्यक हुने उनको भनाइ छ।
सामाजिक सञ्जालमा सक्रिय रहँदा समर्थन र आलोचना दुवै आउने गरेको थापाले बताए। सकारात्मक प्रतिक्रियाले कामलाई निरन्तरता दिन उत्साह दिने र आलोचनाले सुधार गर्नुपर्ने पक्ष बुझ्न सघाउने उनको अनुभव छ। नकारात्मक प्रतिक्रियालाई पनि सिकाइका रूपमा लिएर आगामी सामग्री सुधार्ने गरेको उनले बताए।
दर्शकका सुझाव सुन्न र आफ्ना कमजोरी सच्याउन तयार हुनुपर्ने उनको बुझाइ छ। आलोचनाभित्र उपयोगी सुझाव भए त्यसलाई ग्रहण गरेर अझ राम्रो काम गर्ने प्रेरणाका रूपमा लिने गरेको उनले सुनाए।
नियमित कामसँगै भिडियो र पोडकास्टलाई निरन्तरता दिन समय व्यवस्थापन आवश्यक पर्ने थापाले बताए। अमेरिकाको व्यस्त जीवनमा काम र अन्य जिम्मेवारीबीच समय छुट्याएर सामग्री तयार गर्ने गरेको उनको भनाइ छ।
“अमेरिकामा पैसाभन्दा पनि ठूलो कुरा समय हो। समयलाई कसरी व्यवस्थापन गर्न सकिन्छ भन्ने नै मुख्य कुरा हुन्छ,” उनले भने।
गर्नुपर्ने कामलाई साना कार्यमा बाँडेर प्राथमिकताका आधारमा अघि बढ्दा समय मिलाउन सहज हुने उनले बताए। विषय छनोट, तथ्यको जाँच र सामग्रीको तयारीलाई उपलब्ध समयअनुसार अघि बढाउँदै आएको उनको भनाइ छ।
आगामी दिनमा अझ बढी सचेतनामूलक भिडियो, तथ्यपरक सामग्री र जानकारीमूलक लेख ल्याउने थापाको योजना छ। अन्यायविरुद्ध आवाज उठाउने, जनजीवनमा काम लाग्ने विषयलाई स्थान दिने र प्रवासी नेपालीका अनुभवलाई संवादमा ल्याउने कामलाई निरन्तरता दिने उनले समाज प्रेसलाई बताए।
© 2026 All right reserved to samajpress.com | Site By : Sobij