समाना देवकोटा

आस्टिन, टेक्सास। श्रावण महिनाको अन्तिम सोमबार टेक्सासको हट्टोस्थित श्री पशुपतिनाथ मन्दिरमा महा रुद्राभिषेक, रुद्राभिषेक, विशेष पूजा–आराधना, दिव्य महाआरती तथा महाप्रसाद वितरण कार्यक्रम श्रद्धापूर्वक सम्पन्न भएको छ। बिहानदेखि साँझसम्म करिब दुई हजार श्रद्धालु मन्दिर पुगेको आयोजकले जनाएको छ।

ग्रेटर अस्टिन नेपाली सोसाइटी (ग्यान्स) को व्यवस्थापनमा श्रावण महिनाभर प्रत्येक सोमबार सञ्चालन हुँदै आएको विशेष धार्मिक कार्यक्रमको अन्तिम दिन बिहानैदेखि मन्दिरमा भक्तजनको चहलपहल बढेको थियो। आस्टिन तथा आसपासका क्षेत्रसँगै टेक्सासका विभिन्न स्थानबाट आएका नेपाली तथा अन्य हिन्दू धर्मावलम्बीले भगवान् पशुपतिनाथको दर्शन, पूजा–आराधना, जलाभिषेक, रुद्राभिषेक तथा मन्दिर परिक्रमा गरेका थिए।

दिनभरका धार्मिक अनुष्ठानपछि साँझ तीन जना वैदिक पण्डितको संयुक्त सहभागितामा पशुपतिनाथ शैलीको दिव्य महाआरती गरिएको थियो। नेपालको पशुपतिनाथ क्षेत्रमा गरिने आरतीको झल्को दिने गरी आयोजना गरिएको महाआरतीमा ठूलो संख्यामा भक्तजन सहभागी भएका थिए।

मन्दिरका पुरोहित हरिशरण आचार्यका अनुसार श्रावणको अन्तिम सोमबार विशेष पूजा, रुद्राभिषेक तथा महाआरतीमा श्रद्धालुको उत्साहजनक सहभागिता रहेको थियो। श्रावण महिनालाई भगवान् शिवको आराधनाका लागि विशेष पवित्र मानिने भएकाले महिनाभरका सोमबारमा मन्दिरमा भक्तजनको उल्लेखनीय उपस्थिति रहेको उनले बताए।

कार्यक्रममा सहभागी भक्तजनका लागि सत्सङ अमेरिका र स्थानीय करी किचन रेस्टुरेन्टको सहयोगमा महाप्रसादको व्यवस्था गरिएको थियो। पूजा तथा महाआरतीपछि भक्तजनले महाप्रसाद ग्रहण गरेका थिए।

श्रद्धालुको सुविधालाई ध्यानमा राख्दै आफ्नो सवारी साधन नभएका भक्तजनका लागि निःशुल्क शटल सेवा समेत सञ्चालन गरिएको थियो। ठूलो संख्यामा भक्तजन आउने अवस्थालाई ध्यानमा राखेर पार्किङ, आवतजावत तथा स्वयंसेवक परिचालनलाई पनि व्यवस्थित गरिएको थियो।

ग्यान्सका अध्यक्ष पदम ठकुराठीका अनुसार, यस वर्ष श्रद्धालुको बढ्दो सहभागितालाई मध्यनजर गर्दै पार्किङ तथा आवतजावत व्यवस्थापनमा विशेष ध्यान दिइएको थियो। भक्तजनलाई सहज रूपमा मन्दिरसम्म पुग्न र फर्कन सहयोग पुर्‍याउने उद्देश्यले निःशुल्क शटल सेवासमेत उपलब्ध गराइएको थियो। कार्यक्रमलाई व्यवस्थित रूपमा सम्पन्न गर्न स्वयंसेवकहरूको सक्रिय परिचालन गरिएको थियो।

श्रावण महिनाको पहिलो सोमबारदेखि सुरु भएको विशेष धार्मिक कार्यक्रमअन्तर्गत प्रत्येक सोमबार महा रुद्राभिषेक, रुद्राभिषेक, अर्चना, पूजा–आराधना, दिव्य महाआरती तथा महाप्रसाद वितरण हुँदै आएको थियो। अन्तिम सोमबारको कार्यक्रमसँगै यस वर्षको श्रावण महोत्सवका चारै सोमबारका विशेष धार्मिक कार्यक्रम सम्पन्न भएका छन्।

अध्यक्ष ठकुराठीले यसअघि प्रवासमा रहेर पनि नेपाली धर्म, संस्कृति, परम्परा र पहिचानको संरक्षण गर्दै नयाँ पुस्तामा हस्तान्तरण गर्नु समुदायको साझा दायित्व भएको बताएका थिए। श्री पशुपतिनाथ मन्दिर निर्माणपछि विभिन्न स्थानबाट श्रद्धालुको सहभागिता बढ्दै गएको उल्लेख गर्दै मन्दिरलाई भविष्यमा अझ व्यवस्थित धार्मिक, सांस्कृतिक तथा सामुदायिक केन्द्रका रूपमा विकास गर्ने योजना रहेको उनले बताएका थिए।

मन्दिर व्यवस्थापनले परिसर विस्तारका लागि करिब २.५ एकर थप जग्गा खरिद गर्ने प्रक्रिया, पर्याप्त पार्किङ, कम्युनिटी सेन्टर, शौचालय तथा बौद्ध स्तूपसहितका पूर्वाधार विकास गर्ने दीर्घकालीन योजना अघि सारेको छ। यसअघि बोर्ड अफ ट्रष्टी प्रमुख देवराज न्यौपानेले पनि मन्दिरलाई भविष्यमा धार्मिक तथा सामुदायिक केन्द्रका रूपमा विकास गर्न समुदायको साथ, सहयोग र सहभागिता आवश्यक रहेको बताएका थिए।

हट्टोस्थित श्री पशुपतिनाथ मन्दिर टेक्सासमा रहेका नेपाली तथा हिन्दू धर्मावलम्बीको धार्मिक आस्थाको केन्द्रसँगै नेपाली धर्म, संस्कृति र परम्परालाई प्रवासमा निरन्तरता दिने साझा थलोका रूपमा विकसित हुँदै गएको छ।