देशभर सेना र सुरक्षा निकायको कारवाही : ७३ नाल हतियार बरामद, सयौँ फरार कैदी पक्राउ

काठमाडौँ । नेपाली सेना लगायतका सुरक्षा निकायहरू परिचालन भएपछि आज दिउँसो १ बजेदेखि ५ बजेसम्मको अवधिमा देशका विभिन्न स्थानमा उल्लेखनीय सुरक्षा कारवाही भएको छ।

महाराजगन्ज क्षेत्रबाट नेपाली सेनाले लुटपाटमा संलग्न ४ जना व्यक्तिलाई नियन्त्रणमा लिँदै ७ नाल हतियार बरामद गरेको छ। बरामद गरिएका हतियारसँगै म्यागजिन, राउण्ड, व्युनेट लगायतका एसेसरिज तथा व्यक्तिगत सामग्री पनि फेला परेका छन्। यस्तै, विशेष सूचनाको आधारमा बालाजु माछापोखरी क्षेत्रमा गरिएको कारबाहीमा थप १ नाल हतियार बरामद भएको छ। यसरी हालसम्म जम्मा ७३ नाल हतियार बरामद भएको नेपाली सेनाले जनाएको छ ।

यसैबीच, सेनाका अनुसार काभ्रेपलाञ्चोकको धुलिखेल जिल्ला कारागारमा कैदी बन्दी र नेपाल प्रहरीबीच भएको झडप नियन्त्रणमा आएको छ। डिल्लीबजार कारागारमा लागेको आगो पनि नेपाली सेना तथा अन्य सुरक्षा निकायको प्रयासमा निभाइएको छ।

फरार कैदी बन्दी नियन्त्रणका लागि चलाइएको अभियानमा विभिन्न जिल्लाबाट उल्लेखनीय सफलता हासिल भएको छ। सुरक्षा फौजले सप्तरीमा ४ जना, सुनसरीमा २०२ जना, रुकुम पश्चिममा ४३ जना, कपिलवस्तुमा ५० जना र म्याग्दीमा ४ जना फरार कैदीलाई पक्राउ गरेको छ।

सुरक्षा निकायहरूले कारबाहीलाई अझै कडाइ गर्ने र मुलुकभर सुरक्षा व्यवस्थालाई थप मजबुत बनाइने बताएका छन्।