काठमाडौँ । झापाको बिर्तामोड नगरपालिकाले यहाँका नौ भूमिहीन सुकुम्वासीलाई जग्गाधनी पुर्जा वितरण गरेको छ ।

नगरपालिकामा आज आयोजित एक कार्यक्रमबीच बिर्तामोड-७ का उनीहरूलाई जग्गाधनी पुर्जा वितरण गरिएको हो ।

वर्षौँदेखि जग्गाधनी पुर्जाको पर्खाइमा रहेका बिर्तामोड-७ का निरानध्वज लिम्बू, अमृतबहादुर लिम्बू, निर्मला लिम्बू, हरिकला मगर, मसिप्रकाश राई, आइतराज लिम्बू, मैतिमाया लिम्बू, गुरुदेव घिमिरे र कृष्णबहादुर थापालाई जग्गाधनी पुर्जा वितरण गरिएको हो ।

जग्गाधनी पुर्जा वितरण गर्दै बिर्तामोड नगरपालिकाकी नगरप्रमुख पवित्रा महतारा प्रसाईँले प्रक्रिया पूरा भएका अन्य नगरवासीलाई चाँडै पुर्जा वितरण गरिने बताए ।

बिर्तामोड-७ का वडाध्यक्ष अविरल कृष्ण खरेलले वडाहरूले प्रक्रिया अघि बढाइरहेकाले नगरका एक हजार २०० भन्दा बढी भूमिहीन सुकुम्वासीलाई पुर्जा वितरण गर्ने तयारी भइरहेको जानकारी दिए । उनका अनुसार बिर्तामोड-७ मा ३९ दलित, ९३ सुकुम्वासी र २७७ अव्यवस्थित परिवार छन् । जग्गा स्रेस्ता, मोठ कायम गरेर वितरण गरिएकाले बैंकमा कारोबार गर्न पाउने भए पनि १० वर्षसम्म बिक्री–वितरण गर्न नपाइने व्यवस्था रहेको भूमि समस्या समाधान आयोग बिर्तामोडका प्रमुख विमल पोखरेलले जानकारी दिए।