बजगाईंले बेलायतको उदाहरण दिँदै भने, ‘पूर्वप्रधानमन्त्री डेभिड क्यामरुनले एक स्वास्थ्य उपकरण आपूर्तिकर्तालाई रात्रीभोजमा घुसाएको कारण आफ्नो स्वास्थ्यमन्त्रीलाई पदमुक्त गरेका थिए । क्यामरुनले कैयौं मन्त्रीहरूलाई बर्खास्त गर्दै नैतिक शासनप्रति आफ्नो प्रतिबद्धता देखाए, जुन कुरा नेपालका नेताहरूले सिक्न आवश्यक छ ।’

उनले उत्तर अमेरिकी गुप्तचर संयन्त्रको एउटा चर्चित भनाइ उल्लेख गर्दै भने, ‘यदि म तिमीलाई भन्दिन्छु भने मैले तिमीलाई मार्नुपर्छ । अर्थात् संवेदनशील सूचनाका स्रोतहरू लीक हुनुहुँदैन ।’

सांसद बजगाईंले विभिन्न विवाद र भ्रष्टाचारका आरोपहरूको विश्वसनीय स्रोत रहेको दोहोर्‍याउँदै यस्ता विषयहरूको अनुसन्धान गर्ने जिम्मेवारी पार्टीको नभई तोकिएको राज्य निकायहरू भएको बताए ।

बजगाईंले अनियमितता खुलासा गर्नेको सुरक्षा कानूनबारे प्रश्न गर्दै नेपालमा यस्ता उजुरीकर्तालाई बचाउने प्रभावकारी कानून छ कि छैन भन्दै प्रश्न उठाए । उनले भ्रष्टाचार उजागर गर्नेहरूलाई दबाउन होइन, बरु प्रोत्साहन गर्नुपर्ने बताए ।

उनले निधि, सिंह र कोइराला परिवारको योगदानलाई स्वीकार गर्दै अन्य स्वतन्त्रता सेनानीहरूलाई पनि उपेक्षा गर्न नहुने र पार्टीको मूलधारबाट बिस्थापित गर्न नहुने बताए ।

पार्टी नेतृत्वको आन्तरिक गुनासाहरू केवल पार्टी फोरममै सीमित गर्नुपर्ने धारणा गलत रहेको भन्दै उनले यस्तो प्रणाली कम्युनिस्ट पार्टीहरूमा हुने, तर नेपाली कांग्रेस जस्तो लोकतान्त्रिक दलमा नहुने स्पष्ट पारे ।