चितवन । नेकपा एमालेका अध्यक्ष केपी शर्मा ओलीले वर्तमान सत्ता गठबन्धन भत्किए अस्थिरता निम्तने भएकाले यसलाई भत्काउने चलखेल गर्न नहुने बताएका छन् ।

शुक्रबार चितवनको भरतपुर विमानस्थलमा पत्रकारहरुसँग कुरा गर्दै अध्यक्ष ओलीले गठबन्धन भत्काउने त्यस्तो प्रयास राष्ट्रिय राजनीतिका लागि घातक हुने बताएका हुन् । उनले यो सत्ता समीकरण दिगो हुने दाबी गरे ।

उनले भने, ‘यो समीकरण भत्कियो भने कुनै राम्रो कुरा हुनेवाला छैन । त्यसैले यो समीकरण भत्किदैन। भत्किन दिइँदैन ।’

अध्यक्ष ओलीले सरकारले आवश्यक ठानेर नै विभिन्न मुलुकका राजदूतलाई फिर्ता बोलाएको हुनसक्ने भन्दै आफूलाई यसबारे थाहा नहुने बताए ।

उनले भने,’यो प्रधानमन्त्री र परराष्ट्रमन्त्रीले जान्ने कुरा हो । हामीलाई थाहाँ हुँदैन यस्ता कुरा ।’ अध्यक्ष ओलीले आफूले बोलेको कुरा अनावश्यक ढंगले शिक्षा मन्त्री श्रेष्ठसँग जोडिएको बताए।

उनले भने, ‘त्यो कसैसँग सम्बन्धित छैन, संयोगले कसैसँग कुनै नाम मिले जस्तो, ठेगाना मिलेजस्तो पनि लाग्दैन मलाई, त्यसलाई अनावश्यक ढंगले जोड्नु व्यर्थ छ ।’

ओलीले शिक्षा मन्त्री श्रेष्ठप्रति लक्षित गर्दै विदेशीसँग विवाह गरेर नेपाल घुम्न आएको बेलामा मन्त्री बनेको भन्ने अभिव्यक्ति दिएका थिए ।

उनले गिरिबन्धुको जग्गा सट्टापट्टाका विषयमा काठमाडौं महानगरपालिकाका मेयर बालेनले अभिव्यक्तिप्रति आपत्ति जनाए ।

उनले बालेनको अभिव्यक्तिलाई भैंसीको ढाडमा झिंगा बसेकोसँग तुलना गरे । उनले भने, ‘भैंसीको ढाडमा झिँगा बस्यो कि के बस्यो, थाहा पनि पाएको हुँदैन, झिँगा दङ्ग परेको हुन्छ, चार लात हानेँ भनेर । म कसैसँग अनावश्यक ढंगको विवादमा पर्न चाहन्नँ ।’

उनले राष्ट्रिय राजनीतिलाई परिपक्व, जिम्मेवार, सभ्य बनाउनुपर्ने बताए। मेयर साहले गिरिबन्धु जग्गा प्रकरणमा दस हजार करोडको बदमासी रहेको र त्यसमा अध्यक्ष ओलीको संलग्नता रहेको भन्दै सामाजिक संजालमार्फत बताएका थिए ।