काठमाडौं । संघीय संसदअन्तर्गत राष्ट्रिय र प्रतिनिधिसभाको बैठक आज पनि बस्दैछ । बिहीबारको बैठक शुरु हुनासाथ प्रतिपक्षी नेपाली कांग्रेसले प्रतिनिधि सभामा अवरोध गरेपछि बैठक आज बिहान ११ बजेसम्मका लागि स्थगित गरिएको थियो।

बिहीबार बैंठक प्रतिपक्षी नेपाली कांग्रेसको विरोधबीच सभामुख देवराज घिमिरेले बैठक सञ्चालन गर्न खोजेपछि सभाभित्र असहज स्थिति बनेको थियो ।

सभामुख घिमिरेले गृहमन्त्री रवि लामिछानेलाई बोल्न समय दिएका थिए । तर, प्रतिपक्षीले लामिछानेलाई रोक्न खोजेपछि एमालेका सांसद प्रतिकारमा उत्रिदा दुई पक्षका सांसदबीच धकेलाधकेलको स्थिति उत्पन्न भएको थियो । त्यसपछि कांग्रेसका सांसदहरुले नाराबाजी जारी राख्दा सभामुखले बैठक आज ११ बजे सम्मका लागि स्थगित गरे ।

पछिल्लो समय रास्वपा सभापति एवं गृहमन्त्री रवि लामिछानेमाथि सहकारीको बचत अपचलनबारे संसदीय छानबिन गर्न कांग्रेसले समिति गठन गर्नुपर्ने माग गरेर सदन अवरोध गर्दै आएको छ ।

तर, संसद सचिवालयले भने बैठक बस्ने नबस्ने अन्यौंलताकाबीच दुवै सदनको सम्भावित कार्यसूची बनाएको छ । यस्तै, राष्ट्रिय सभा बैठक पनि दिउँसो सवा १ बजेका लागि बोलाइएको छ ।

बैठकमा राष्ट्रपतिको कार्यालयबाट प्राप्त पढेर सुनाउने, राष्ट्रपतिबाट भएको सम्बोधनको प्रति टेबुल गर्ने सम्भावित कार्यसूची छन्। यस्तै प्रधानमन्त्री तथा मन्त्रिपरिषद्को कार्यालयबाट प्राप्त पत्रबारे जानकारी गराउने, राष्ट्रपतिको सम्बोधनका लागि ‘धन्यवाद प्रस्ताव’ प्रस्तुत गर्ने, समिति सदस्यको नाम मनोनयन गर्ने, कानूनमन्त्री र सञ्चारमन्त्रीले विधेयक पेश गर्नेलगायतका विविध कार्यसूची उल्लेख छन् ।