काठमाडौं । अख्तियार दुरुपयोग अनुसन्धान आयोगले वाइडबडी विमान खरिदमा भ्रष्टाचार भएको दाबी गर्दै बिहीबार विशेष अदालतमा मुद्दा दायर गरेको छ ।

अख्तियारले तत्कालीन पर्यटनमन्त्री कांग्रेस नेता जीवनबहादुर शाही, नेपाल वायु सेवा निगमका तत्कालीन महाप्रबन्धक सुगतरत्न कंसाकार, तत्कालीन पर्यटन सचिव शंकर अधिकारीलगायत ३२ जनाविरुद्ध मुद्दा दायर गरेको हो । कांग्रेस नेता शाही अहिले कर्णाली प्रदेशसभा संसदीय दलका नेता छन् ।

उनीविरुद्ध मुद्दा दायर भएसँगै उनी प्रदेशसभा सदस्यबाट स्वतः निलम्बनमा परेका छन् । अख्तियारले दुईवटा वाइडबडी विमान खरिदमा भ्रष्टाचार भएको दाबी गरेको छ ।

अख्तियारले वाइडबडी विमान खरिदमा एक अर्ब ४७ करोड रुपैयाँ भ्रष्टाचार भएको दाबी गर्दै प्रतिवादीविरुद्ध सो बराबरको बिगो र बिगो बराबरको सजायको माग दाबी लिएर मुद्दा दायर गरेको हो ।

नेपाल वायुसेवा निगमले कर्मचारी सञ्चय कोष र नागरिक लगानी कोषबाट ऋण लिएर करिव २४ अर्ब रुपैयाँमा एयरबस कम्पनीका दुईवटा वाइडबडी विमान खरिद गरेको थियो ।